本文重點
阿里巴巴（01688）主席馬雲一向妙語連珠。最近，佢老哥又話前幾個星期去咗微軟蓋茨屋企，加埋蓋茨老友股神巴菲特，三位大佬吹咗好耐水。繼索羅斯買咗阿里巴巴少少股之後，唔知蓋茨同巴菲特又有冇機會買阿里巴巴呢？
三人原是舊相識
話說回頭，馬雲同蓋茨同埋巴菲特其實早已經係舊相識。當年馬雲仲未廣泛受世人認識嗰陣，雅虎楊致遠就帶咗佢去參加蓋茨同埋巴菲特嘅聚會，蓋茨同埋巴菲特兩位係老友就係人都知，「Friend」到直情一齊晒冷捐身家。
依家阿里巴巴大股東雅虎，用緊微軟搜尋引擎「Bing」；而巴菲特一向唔鍾意科技股，但兩年前就一改作風，買咗比亞迪（01211），所以話，呢幾位仁兄會有令世人驚喜嘅合作，一啲唔奇。
馬雲呢幾日都去咗台灣。被譽為「財金金句王」嘅馬雲，又有金句出現。佢盛讚浙江政府嗰陣，就話「最好嘅政府就是不管嘅政府，最好嘅婆婆就是不管事嘅婆婆。」即時引嚟全場笑聲。