受A股影響，恒指午市一度升超過300點，可惜最後又係無以為繼，收市升133點，報19,621點，成交僅過500億元，話基金經理好積極咁入市都無人會信！今日股市滿街屍骸，好友博反彈的力度一次比一次弱，理智話畀筆者聽，股市離底不遠，刻下正係入市良機，但試問如斯市況有膽全力入市的，又有幾人？

政府不宜干預樓市

舊年樓市谷底反彈三成，觸動不少想上車又未上車嘅市民怨氣，港府希望冷卻炒風，半恢復賣地並搞個九招十二式出嚟，近兩個月發展商為符合新指引，一手樓銷情幾乎癱瘓，二手樓無論價量都跌，而早前獲大幅超額認購的居屋貨尾，埋門去到揀樓，突然唔少中標人士放棄上車。事件說明政府在樓市還是少做少錯，減少干預為上，樓市供求本身就有着自然調節能力，政府推居屋甚至資助力有不逮者上車，好大機會好心做壞事。

說回前日新地（00016）斥資109億元買入何文田豪宅地皮，以總投資額180億元加埋兩成發水，每呎不連利息成本都要1.66萬元，呎價比鄰近的何文田半新豪宅灝畋峰，有過之而無不及。事實上，新地的樂觀，與市場近期傾向悲觀的睇法有相當落差，作為最大地產發展商之一，筆者不會懷疑新地的測市能力，而且公司近年也更積極在豪宅發展上。香港每年千多個豪宅供應量，對比中國經濟高增長下不斷湧現的發迹買家，要消化新供應，應是比受薪一族的普羅市民想像中來得容易。

資產值折讓近三成

新地市值2,680億元，截至去年底中期報告，股東資金是2,310億元，市帳率1.16倍。要知地產發展商不會把所有投資物業及土地以市值入帳，否則未來賣樓套現利潤何來？美銀美林重估其磚頭資產後，指目前股價較資產淨值，實則有29%折讓，高於歷史折讓15%，反映股市的悲觀，相當於樓市短期要跌15至20%。

到底不去揀樓的小業主、悲觀的股市投資者、抑或好友新地睇錯？惟有等時間證明。估計新地撇除重估前營運溢利，未來兩年都在150億甚至160億元樓上，估值頗合理。近期恒指走勢麻麻，但見地產股指數同新地股價營造圓底反彈的趨勢明顯，看官如果買唔起2萬蚊呎豪宅，買新地或者都係一個唔錯嘅選擇。