本文重點
李德麟做咗金銀業貿易場理事長已四年,即將喺新一屆理監事會選舉中退任。金貿場下周二(十五日)將舉行新一屆理監事會選舉,太子聽聞,現任副理事長張德熙接任理事長呼聲極高,如無意外,新一屆理事長非佢莫屬。現時貿易場共有兩名副理事長,除咗張德熙外,另一名係平和金銀嘅陳尚智。張德熙已出任貿易場理監事會多年,絕對稱得上係老臣子之一。
黃金產品已訂細則
事實上,近年張德熙曝光頻頻,經常發表有關金價走勢預測同貿易場發展言論,佢接任理事長一職亦好順理成章。適逢貿易場今年一百周年紀念,佢接任理事長亦更具意義。
至於金銀業貿易場,早前提出擬最快於今年下半年推出人民幣結算黃金產品,現時已訂出產品合約細則,產品將分1公斤同3公斤裝,以人民幣報價及定價,清算時就可以用人民幣、港元及美元。