港鐵（00066）南昌站上蓋項目「流標」，政府一直話唔想見到樓價過高，但急推南昌站大型住宅項目招標，首期補地價金額卻叫出天價（每呎樓面補地價達6,500元），咁樣算唔算係人格分裂呢？
上周傳來中國外匯局擬評估歐元債券，但已即時遭當局否定。事實上，呢個時候減持歐元資產，對中國而言係損人不利己嘅事。再講，去年次季及第三季，內地豪擲4萬億元人民幣刺激經濟，企業業績由谷底急彈，但今年初起資金面趨緊，加上冷不防殺出歐洲債務危機，歐洲進口需求勢受打擊。喺去年同期比較基數較高之下，嚟緊兩季企業業績可能未及預期，這將限制股市表現。建議選股宜盡量側重內需，以及財政實力較強嘅股份，內房及出口股盡量避之則吉。
富士康續向下尋底
富士康（02038）呢排認真運滯，員工自殺問題被廣泛報道，雖然公司舵手已親自高調處理，但未能平息風波，更已引起各大客戶關注。上周五富士康股價早段衝過高位6.2元便掉頭向下，最後逆市低收2.7%，報5.77元。短線反彈未能重上6元關嘅話，要提防再向下尋底。
天津發展（00882）管理層上周表示，公司重組已有計劃，但細節尚有待公布，消息刺激股價做好，上周五高見4.33元，收報4.29元，升2.1%。
其實，有關天津市窗口公司資產重組一事經已醞釀多時，去年港口業務已率先啟動重組。津發目前主營提供公用設施、經營商業房地產、釀酒、升降機及扶手電梯業務。為了配合天津市政府嘅收費道路改革，繼前年底展開出售外環東路嘅營運後，津發出售津濱公路權益嘅交易亦喺今年完成。此外，經母公司完成重組港口業務後，津發喺天津港發展（03382）嘅持股亦降至21%。
好明顯，單靠現存業務及投資，津發要保持股東資本回報增長，存在一定難度，亦未能充分反映作為天津市窗口公司嘅融資平台角色，重組資產乃事在必行。股價走勢方面，津發喺3.9至4元乃一支持區。不過，領教過天津港重組後股價長期沒起色，阿莊傾向等津發重組方案明朗化後，才見機行事。