本文重點
歐洲股市暫時喘定，內地A股靠穩，港股持續反彈，恒指昨日收報19,431點，升1.22%。平心而論，港股反彈力度並唔理想，短線要企穩喺10日線19,663點樓上，走勢才能言穩。時值月尾，大戶轉倉活動大致完成，股市「六絕」頗大機會係陰乾市，博反彈要適可而止，中長線亦宜分注行事，小心使得萬年船！
金魚缸冇咩焦點，皆因城中首富李嘉誠及帝通國際（08220）執董周星馳會見傳媒。令阿莊印象最深刻嘅，係李首富話，自己當年打工和做生意都要十多年才置業。世界難撈十年如一日，八、九十後毋須自怨自艾，亦唔好奢望一步登天，只管努力向上，終有出頭天。
聯想（00992）剛宣布截至今年三月底止年度業績，一如預期轉虧為盈，賺1.29億美元，每股基本盈利1.42美仙，並恢復派發末期息，每股4.5港仙。年內，聯想嘅個人電腦銷量增長28.2%，市場份額創新高，達到8.8%。
相比起截至去年底嘅首三季度純利1.16億美元，末季表現也許略為遜色，這與淡季因素有關。
展望今年，移動互聯網業務尚處投資期，加上原材料價格趨升，將對毛利率構成壓力，而近季全球貨幣匯率波動，亦對其業務造成挑戰。近月其股價由高位回落三成，正反映這些風險因素。惟過去一年，聯想管理層努力嘅成果，獲投資者認同，且看嚟緊重點拓展嘅手機業務，能否帶領公司再上高峰。
回歸A股事在必行
此外，消息指中交建（01800）擬透過私有化A股路橋建設（600263）嘅方式回歸A股市場。事實上，屬同類股嘅中鐵（00390）及中鐵建（01186）均已發行A股，中交建發A亦事在必行，若傳聞屬實，對公司業務發展及估值均有益處。
講到中交建，其母公司擬購併中房集團嘅消息亦甚囂塵上，且看國資委能否促成其事。圍繞同系購併消息不絕，近日中交建股價回落至6元水平現承接，昨日收報6.51元，升5.5%，市盈率十一倍，相信6元水平具承接，可留意消息炒波幅，向上較大阻力喺7至7.2元。