本文重點
太子覺得中環確實係「星光熠熠」嘅地方。話說太子某日喺中環一間商業大廈嘅大堂見到人稱「歐洲股神」嘅富達國際投資總裁安東尼波頓（Anthony Bolton），之後我哋咁啱同一架Lift、去同一個樓層。
歐洲股神非常友善，交換咗卡片之後，佢仲專登戴番副眼鏡望吓太子張卡片，傾開先知原來佢同屋企人嚟咗香港已經兩個月，密鑼緊鼓為新基金做準備。
基金未推出要封嘴
據聞波頓打骰嘅「新中國基金」計劃喺倫敦上市，已集資逾7.07億美元（約55億港元），若成功掛牌，將成為過去二十年來英國最大嘅新興市場股票上市基金，依家基金進展點樣呢？波頓就話基金未正式推出，現階段要「Blackout」（保持緘默），今年七月前咩都唔可以透露，就算市況睇法亦唔能夠評論，所以佢同屋企人嚟咗香港兩個月，都唔可以見傳媒。
可惜大家講唔夠再講多幾句，Lift門就打開咗，有專人已經喺接待處等緊佢。