尋日收市前幾分鐘，唔少醫藥、電訊等基金愛股，見隔空被掃高，翻查大部分都唔係受MSCI指數調動影響，情況都算罕見。其中，阿里巴巴（01688）在收市前一刻，由14.8元掃到15.9元全日高位，最後收報15.76元，升1.66元，係接近三個月以來首次升穿50日線（15.67元）收市，去年九月開始的漫長跌浪，似乎有轉勢迹象。
本月中，阿里巴巴試過一次暴升，事緣管理層當時透露原來大炒家索羅斯早於去年夏天參觀公司，並身體力行於第三季入咗貨，成為第三大流通股東；今次管理層露口風情況都算特殊，按例香港要持貨超過5%，先需要披露權益，大炒家本來可以神不知鬼不覺下揸貨，但卻無奈曝光。
翻查紀錄，去年第三季阿里巴巴股價介乎13.8至21.8元，計一計中間價都要17.8元，如果信索羅斯有點石成金威力，依家16元樓下入市，隨時比世紀大鱷成本仲要低，市況稍穩，這隻股票值得優先留意。
阿里巴巴（01688） 目標價：19.0元 止蝕價：15.2元