說也奇怪，昨日尾市唔少跌得低殘嘅基金股有買盤大手掃高，如國藥（01099）、康師傅（00322）、恒安國際（01044）、阿里巴巴（01688）、國美（00493）等，升幅均逾10%，唔排除與沽空盤平倉有關。
近日國藥股價顯著回落，嚇窒投資者。瑞信及美林發功，出報告力挺國藥，其股價昨日反彈10.9%至29.5元，單日成交4.65億元。不過，由於近兩周其股價已確認跌穿上升軌道，是浪反彈若未能企穩喺30至31元水平，都係宜趁反彈沽出，候低再作考慮。
內地傳媒引述工信部官員證實，有關三網融合試點方案將於本月底前出台，消息刺激中興通訊（00763）股價升7.7%，收報24.4元；騰訊（00700）亦彈4.3%，報148.6元。
所謂「三網融合」，係指推進電訊網、廣播電視網和互聯網融合發展，實現三網互聯互通，資源共享，具體嘅階段性目標係喺未來三年重點開展廣電和電訊業務雙向進入試點，其後三年完全實現三網融合發展。
三網融合推動盈利
究竟最終現有三大電訊商誰得誰失，阿莊亦冇水晶球，但可以預期嘅係，建立新嘅平台，必須構建龐大嘅基礎建設，大型電訊設備商將會得益，中興便屬一員。
今年首季，中興按中國會計制度計營業收入132億元（人民幣．下同），同比增長13.59%；純利1.09億元，同比增長39.68%。除了設備業務外，公司未來將致力擴大手機業務，去年來自手機等終端產品佔營業收入比重為21.5%，公司目標係喺未來五年將相關比例提升至50%。
阿莊還記得，去年初唔少分析仍擔心，當中國正式推出3G後，設備需求將由高峰回落，對中興業績構成壓力，但去年度公司再創佳績，手機業務成增長亮點。雖然手機業務毛利率未必及得上設備業務，但勝在這個市場處於擴張階段，未來手機業務對盈利貢獻將逐年增加，配合三網融合嘅效益，盈利前景可予憧憬。
近月跌市，中興股價累計跌幅逾三成，估值又再重現吸引力。但當然，後市仍會波動，買貨不用心急。最理想係喺22元以下才動手收集，年底目標重上26至27元，止蝕位19元。