本文重點
太子傳媒老友尋日見到一個奇景，就係居然有人喺港交所（00388）交易大堂內走來走去公然籌款！老友問番啲老行尊，個個都笑笑口話，係開埠以來首次有人喺大堂內賣米，因為大堂內係嚴禁進行證券交易以外嘅活動，咁邊個咁大膽？之唔係港交所行政總裁李小加囉。
小加尋日風塵僕僕，下晝去咗香港上市公司商會演講，然後就趕返公司籌款，義賣樂施米。當然，佢係等到四點鐘收市後，先至開始義賣啦，在場交易員見到CEO笑面迎人遞上慈善米，亦都樂意乖乖奉上20蚊，尋日大市反彈，交易員心情好，部分更捐出「紅衫魚」。
義賣籌款反應踴躍
原來小加履新唔夠五個月，已經參與過好幾次慈善活動，好似上周日港交所公司內部搞足球賽籌款，小加就捐錢兼落埋場踢。今日聖雅各福群會眾膳坊搞食物捐贈活動，小加都會到場。