大笨象（00005）又再落難，唔少散戶入場支持，但喺70元築起嘅「血肉長城」被空軍擊倒，大笨象收報69.55元，跌2.9%，成交金額達29.3億元，沽空額佔25%。

各類股份跌勢全面

此外，家電及電訊設備股昨日亦上演斬倉潮續集，創維（00751）及TCL多媒體（01070）急跌11.6%及7.8%；中國無線（02369）及晨訊科技（02000）分別跌14.9%及13.7%。此外，藥業股亦難逃一劫，國藥控股（01099）挫8.5%，利君（02005）及中國製藥（01093）分別跌11.9%及7.3%。

內房股一如預期食「彈散」，驗證弱勢難改，保險及內銀股沽壓沉重，國壽（02628）及平保（02318）分別跌4%及5%，就連內需股都站不住腳，青啤（00168）急挫9.4%，雨潤食品（01068）跌7%，可見昨日大跌市底下，股份跌勢甚為全面，投資者信心跌至低谷。

中美經濟峰會曲終人散，基本上冇乜重大利好消息，中資股短期冇乜新憧憬，淡友乘機棒打落水狗。執筆期間歐洲股市又再「高台跳水」，真正係佗衰家，日日跌唔知要跌到幾時。查實近期美國經濟數據唔係一面倒咁差，但歐洲呢個計時炸彈一日唔拆除，全世界都冇得安寧，且看嚟緊美國財長赴歐商討協助「拆彈」，能否取得成果。

英國保誠（02378）首日在港掛牌，收市價57.2元，成交得106萬股，冇乜好講。下月新股中，較受關注嘅係做風電設備嘅金風科技，消息指公司擬因應市況削減集資額。本來中傳動（00658）有影子概念，但此一時彼一時，市況唔就講乜都假，且待回試16元水平承接再算。

恒指失守19,000點心理關口，短線下一承接區喺18,800點，若然失守，下一個位要睇17,800至18,000點水平。不過阿莊認為，恒指失守19,200點後，短線其實已呈超賣，加上股份普遍出現三、四成跌幅，如今只待歐洲股市回穩，港股隨時可以來個較為似樣嘅反彈。但當然，喺呢一幕反彈潮出現前，尋底動作將會繼續，特別係過去一年累積可觀升幅嘅基金股，將繼續被輪流洗倉。為免損耗銀彈，大家呢一刻惟有戒急用忍，保留實力，等待時機再度出擊。