美股道指上周五1萬點關失而復得，並倒升收場。不過，圍繞歐、美經濟嘅負面因素太多，隨時又可找來一大堆沽售藉口，如今港股被外圍市牽住走，所以都係無謂估底，但論累計幅度，玩熊證難度亦增加，所以都係一動不如一靜為妙。
展望本周，市場焦點落在中美戰略經濟對話，惟睇會前氣氛，未宜對兩國討論人民幣升值問題存太大期望。講開又講，由於近月市況變化甚大，原本預期年中前人行將會加息，如今極有可能會延後。正正由於內地加息步伐可能延後，加上發改委官員上周主動澄清有關出台更嚴厲打擊樓市新政嘅傳聞，指目前正在制訂嘅房地產規劃只係「十二．五」規劃中嘅常規規劃，並明確表示「三年之內免談房產稅」，有助消除市場憂慮。
內房股有資金撈底
事實上，據內地傳媒報道，近周部分內地私募基金已開始將視線轉移至內房股身上。上周五深、滬股指喺超賣下作出反彈，房地產股便見有資金趁低吸納。且看今輪跌浪中最先進行調整嘅房地產股，能否成為下一輪反彈浪嘅主角。
唔講唔覺，近周兩隻龍頭內房股中國海外（00688）及華潤置地（01109）表現亦有回穩迹象，若要二選其一，論圖表走勢，阿莊屬意中國海外。該股上周四收報14.72元，短線向上睇50日線15.8元，支持位可參考近月收市低位13.92元。
業務恢復進度理想
公路股滬杭甬（00576）今年首季收益及純利分別為15億元（人民幣．下同）及5.26億元，同比增幅均為15%。季度業績披露，滬杭甬高速車流量恢復速度較預期快，自然增長幅度亦較預期高，其中滬杭段嘅車流量增幅達到17.8%，另上三高速嘅車流量亦止跌回穩，可見核心公路業務表現有改善。
滬杭甬係一隻不平凡嘅公路股，皆因其兼營證券業務，首季該業務帶來收益3.39億元，純利1.55億元。為配合發展，未來須投入證券業務嘅成本趨增，幸公路業務提供穩定現金流，可應付發展所需，並維持穩定派息。
以上周四收市價6.79元計，滬杭甬往績市盈率14.4倍，息率5.2厘。下月七日開始，國企指數成分股變動，滬杭甬被剔除，此前指數基金調整組合，或令其股價波動，可留意執平貨機會。