本文重點
尋日太子收到富昌證券總經理兼籃球「狂牛隊」領隊藺常念嘅電話，先知道原來第五屆「金融界精英籃球賽」嘅第一輪循環初賽已經展開，暫時勝出隊伍為「狂牛隊」（由不同嘅金融圈業界組成）、滙豐銀行、恒生（00011）同埋港交所（00388）。藺Sir話今年渣打銀行、永亨（00302）都加入戰團。相信決賽好會精彩。
無懼滙豐巨人中鋒
記得去年恒生贏咗總冠軍，「狂牛隊」就屈居第二。為咗一雪前恥，藺Sir好認真咁話：「現時我哋每個星期都練波，每次打足兩小時，但最衰我係呢個比賽嘅搞手，所以唔可以落場打，否則一定贏晒全場。」
不過，太子八到，滙豐有個六呎五吋高嘅英國人做中鋒，令實力增加不少，點知藺Sir就未驚過咁話：「我哋狂牛隊有個隊員都係六呎六吋高，而且教練又係前港籃球隊球員，實力一啲都唔弱。」