內地A股反彈力弱，滬綜指又再低收，內房股繼續向下尋底，恒大地產（03333）及花樣年（01777）股價均創五十二周即市新低。汽車股駿威（00203）復牌，母公司開出嘅私有化方案被指欠吸引力，股價裂口低開後反覆向下，全日低位見3.38元，收市報3.41元，跌24%。阿莊昨早便收到股友打嚟「哭股喪」，話停牌前買入駿威博私有化，結果慘被套牢。慶幸呢位股友接受意見，上晝未有入場溝貨，否則損失更大。依家洗濕個頭，惟有等換股，做定心理準備要長期作戰。
若果以恒指一月初高位22,671點計算，調整15%支持位喺19,270點，且看假期前後相關水平的承接如何。歐、美市況低迷，內地樓市調整、A股亦已回落至重要心理關口，若股市再大跌，勢必動搖國民對經濟復甦嘅信心，一旦內需增長巨輪逆轉，情況難以想像，故中央政府實有必要及時檢討調控力度，免得落個「一子錯」！
重組業務漸見成果
雖然由今年高位計恒指累計跌幅只係13%，但股份不論大小，三、四成跌幅者可謂俯拾皆是。就如上海實業（00363），由今年初高位42.8元回落至近日低位29.3元，累計跌幅超過三成，市值蒸發145億元，現價往績市盈率僅十一倍，息率3.6厘，市帳率1.3倍。歸根究底，主要係受累於內房淡風，上海世博開幕後，上海概念股見光死，加上歐洲債務危機引發全球跌市，覆巢之下豈有完卵。
唔知大家有冇留意，早前上實宣布收購中新地產（00563），並明言打算將房地產業務注入中新，以之作為日後嘅房地產業務平台。一旦交易順利喺本季內完成，據講上實可藉此新增逾1,000萬平方米土地儲備，並可將房地產業務擴展至上海以外地方，話唔定真係「冷手執個熱煎堆」。
回看近兩年上實積極重組業務，明確以房產及公路基建為主營業務，但等候母公司注資需時較長，藉着收購中新，上實可謂抄了捷徑，長遠前景亦未受近期跌市影響。正所謂有「危」才有「機」，股價喺30元樓下，實力投資者可考慮人棄我取。