本文重點
內地股市喺內房股反彈下回升，恒指昨日亦升229點。阿莊相信，本月清倉嘅基金，要準備喺半年結應付客戶贖回，故不會太積極參與撈底，加上未來兩個月市場將有多項大型集資活動，傳統基金即使沒有參與今次沽貨行動，亦傾向按兵不動，保留現金，故除非有重大利好政策出台，否則不宜對短期市況反彈作過分憧憬。
講開集資活動，消息指交行（03328）擬於下月初展開「A+H」供股計劃，相信此舉係為免與七月初農行招股撞過正着。阿莊睇好內銀股嘅前景，而交行嘅經營往績亦可給予肯定，故建議股東參與供股。
每當市況不濟，資金都愛追求避險之選，內地基建股收益基礎穩健，股價跌到咁上下，又開始重現吸引力。今年首季，中鐵建（01186）按內地會計準則計算之淨利潤按年增47%至13.89億元（人民幣．下同），新簽合同達1,278.8億元。粗略估計，四月以來，其新增合同逾600億元。
毛利率料有改善
由於中鐵建乃十六家獲國資委確定為可以房地產為主業的央企之一，以基建為核心業務，善用資金投資房地產、公路以及礦產等項目嘅發展策略，將有助改善整體毛利率偏低嘅問題，未來數年將漸見成效。
本月上旬，中鐵建股價創五十二周新低8.66元，昨日已反彈上9.29元，現價預測市盈率降至十三倍，難怪近月先後有外資大行唱好。參考○八年下半年嘅股價表現，排除不可預測嘅負面消息出現，照計8元係鐵底，中線9元邊可先下第一注，250日線阻力位在10.7元。
順帶一提，昨日阿莊調整投資組合，以平均價1.755元悉售30萬股天津港（03382），另以平均價33.65元增持兩萬股國壽（02628）。