本文重點
官商關係從來都係千絲萬縷，之前有渣打（02888）主席戴維思棄商從政，做咗英國貿易促進及投資部長，早前又傳出滙控（00005）主席葛霖會係下一任英倫銀行行長嘅熱門人選。但亦有政壇名人放棄仕途投身商界，前英國工黨國會大臣簡樂芙上星期加盟滙控，負責策略小組工作。
簡樂芙曾任國會大臣
現年四十二歲嘅簡樂芙，政治履歷認真唔嘢少，過往獲前英國首相貝理雅器重，曾出任過英國財政大臣、教育大臣及運輸大臣等要職，可算女性中嘅佼佼者。
簡樂芙九七年加入國會，但去年捲入濫用議員津貼醜聞，至上月辭去國會職務。佢原來已鋪好後路，加入滙豐企業發展部門，研究城市改革及消費者保障，呢份工都好適合擁有豐富政治經驗嘅佢擔任。