老實講，中央出招為樓市降溫，樓市轉冷勢必影響上下游行業，如今就連股市都冇得玩，再係咁落去，最終難免影響到內部需求。昨見內需股中，汽車股及家電股均遭拋售，東汽（00489）跌5.7%、長城汽車（02333）跌6.5%、創維（00751）及TCL多媒體（01070）分別跌8%及9%。

放大圖片

放大圖片

究竟依家係咪黎明前嘅黑暗，抑或今年餘下時間，全球經濟都會遠差於預期，乃投資者心中嘅一大疑問。最近國務院總理溫家寶考察天津時亦表示，當前國民經濟繼續回升向好，但國內外形勢仍然極其複雜，宏觀調控面臨嘅兩難問題不少，呢番話正好說明中央政府嘅處境實在不容易。

惠農政策方向不變

睇唔通後市，可離場自保。但對於長線投資者，大眾恐慌之時正係收集實力股嘅時候。若然大家確信中央嘅農業政策不會因為經濟波動而有所改變，可以開始留意農業股。

受惠中央政府加大農機補貼，第一拖拉機（00038）去年業績理想，營業收入89.7億元人民幣，按年增長13%；純利2.4億元人民幣，增長2.56倍，派息增至每股12分，現價計市盈率十四倍，息率2.8%。截至去年底，一拖嘅每股資產淨值為3.78元。

依照中央《一號文件》所講，今年內地支農惠農措施有增無減，加上預期今年原材料價格相對穩定，相信今年一拖可再次實現佳績。再睇股價走勢，相信短線喺4.4至4.5元水平有支持，若守此位回升，可以留意執平貨嘅機會。

上周五阿莊沽出嘅中芯（00981），昨日曾低見0.63元，收報0.65元。短線喺0.6元會放定買盤再博反彈。此外，若A股本周出現見底訊號，考慮到今年出口情況可能較預期遜色，阿莊擬將手持嘅港口股沽出止蝕，換入反彈力度較強嘅內地保險股。