回顧年初至今港股累積跌幅6.6%，比美、英、德、法甚至日本都要差，講來講去，都係中央打擊房地產措施下的連鎖反應，但隨着近期愈來愈多經濟師及輿論擔心，下半年中國出口會陸續浮現歐洲經濟疲弱的影響，中央的確有機會在外圍不明朗下，先給予「退市」政策一段觀察期，至少短期不再落新藥打擊樓價，A股尋日彈升超過2%，就係缸邊傳聞匯金入市所致，儘管這類「救市」消息向來難以證實，但A股由四月開始跌浪，一直未見過連續兩日反彈，周三微升加上周四勁升，似是轉勢訊號，當前或是一次難得的入市良機。

上月底外電報道，印度政府向當地電訊營運商下達通知，禁止由中國電訊設備製造商進口設備，市場解讀矛頭直指中國電訊設備龍頭中興（00763）及沒有上市的華為，結果消息一出，中興股價由31.5元跌到周初最低見過25.5元。

印度封殺影響有限

有趣的是，中興在印度德里的工程中心照原定計劃啟用，看來無受消息影響。到底封殺事件會唔會在政治層面上解決，大家都係得個估字，但近日留意到有證券商研究報告，指今次事件最慘仲係印度電訊商，假如未能按計劃買「平靚正」的內地生產設備，發展中的3G網絡隨時會大幅超支，陷入困難。

其實事件也睇到電訊設備市場，再非昔日歐美獨大，內地土炮企業競爭力愈來愈強。講番中興，美銀美林估計其今、明兩年於印度的銷售額，大約佔整體一成，但因毛利較低關係，最後對純利影響應該相當輕微，如果這個睇法無錯，近日股價有跌過龍之嫌。

中興的歷史市盈率相當闊，介乎十至五十倍，平均則為三十倍，再睇一○年預期大約20.5倍，以今明兩年分別為30%及22.4%的年增長率計，估值應該仲未完全反映增長條件，建議可於28元左右吸納，中長線值得睇高一線。