投資組合中，中航科工（02357）股價喺短短一個月內由高位回落逾30%，但不見得基本因素有太大變化。若短期此股喺2.7至2.8元水平有承接，可以考慮加注。

放大圖片	放大圖片	放大圖片

回說香港樓市，東涌地皮拍賣價遜於市場預期，拖累全城放盤價急插水。有指發展商聯合「不舉手」，以回應政府嘅「九招十二式」。但阿莊反而認為，發展商明白政府對樓市過熱嘅憂慮，擺出合作嘅態度，未嘗唔係好事，相信嚟緊幾塊地王推出拍賣，「餓地」已久嘅大發展商，唔會錯過增購土儲嘅機會。

港鐵（00066）主要從事公共運輸服務，本來係一隻百分百公用股，但由於部分收入來自鐵路上蓋物業發展收益，故亦可看待成半隻地產股。去年港鐵來自鐵路相關利潤貢獻約67億元，而物業發展嘅貢獻則為35億元。

樓市調整影響有限

阿莊曾指，樓市調整會為港鐵嘅收益添上不明朗因素，但細看其今年入帳項目，日出康城第二期「領都」已於今年初獲發入伙紙，另將軍澳五十六區嘅小型商場將於下半年獲發入伙紙，故料近期樓市發展對今年物業發展收益影響不會太大。

至於核心嘅鐵路業務，港鐵頗大機會喺下半年就本港客運收費提出加價申請，而內地鐵路相關業務亦會較全面發揮效益，整體盈利前景審慎樂觀。

近日其股價回落至26元水平現承接，現價往績市盈率十六倍，相信年內尚有機會再上試五十二周高位29.9元，是浪調整只要穩守25至26元水平，不妨留意上車機會。