此外，德國及法國為咗接濟希臘呢個窮細佬，搞到自己周身蟻，政府信任度下跌，歐央行行長特里謝也承認，今次救市唔係所有歐元區財金官員一致同意，有人質疑繼續畀幾個財困兄弟留响歐元區大家庭係咪正確決定，睇怕今次「歐豬」五國合演的「豬」門恩怨唔會一集就完咁簡單，話唔埋隨時變成長篇連續劇有排捱。

祖國四月份CPI升2.8%，高過市場預期的2.5至2.7%，驚人行出手加息，深滬股市插水，累埋港股跌番前日超過一半升幅，恒指跌280點報20,146點。

賣地冷場意料中事

唔講唔知，過去幾日港元息升得頗急，三個月銀行同業拆息由0.13厘抽上0.2厘水平，小道消息話歐資行近幾日有明顯抽資情況，史提芬雖然認為港股短期已經响19,400點見咗底，但今浪反彈，恐怕唔會好似二月般勢如破竹。

尋日特區政府賣地，一幅東涌臨海地皮，在拍賣官三催四請下幾乎收回，最後草草以34.2億元拍板，僅比底價高一成九，同市場預測的42億至50億元相差一大截。不過，筆者對結果唔覺得太意外，一來地皮勾出是在希臘出事之前（股市都跌近一成）。

其次，今年賣地焦點係政府幾幅作定期拍賣的豪宅地，發展商點部署外人無法猜度，或者東涌地低價成交，會對未來幾幅靚地底價構成下調壓力，如果我係地產商，或許希望尋日東涌地無人出價收回仲好。最重要係政府近期擺出姿態，樓市可橫行、可跌，但不可升，地產商亦無謂勉強出價，招來更大力度的調控，對短期賣樓計劃造成反效果。

4.55厘息更勝債券

中電（00002）公布首季營運數據，總收入達133.9億元，同比上升21.2%，管理層特別強調增長來自澳洲業務及澳元升值，本地電力業務因為潮濕天氣，售電上升6.1%至63.35億元，佔整體收入已低於五成，刻意經營，無非淡化市民對年初加電費的反感。

自准許利潤率調低到9.99%，中電股價與業績都相對平淡，○九年原地踏步，一○年升3.6%，當然對比恒指今年近8%的跌幅，算跑贏大市，可惜對追求刺激，要求絕對回報的投機者，這可能未必屬閣下杯茶。

中電業績受准許利潤下跌影響，由○七年及○八年高峰期的106億及104億元，短期回落到85億至88億元，但對小股東依然慷慨，第一季中期息有0.52元，維持過去兩年水平，大行估全年會派2.48元，與去年一樣，以54.35元股價，在當前的零息期下有4.55厘股息，論回報其實已好過債券或者定期投資多多聲。

睇番九十年代，中電盈利複合年增長其實大約6.8%，唔算好驚人，但股價累積升近三倍，或者大家都忽略，有時穩穩陣陣，長遠一樣可獲理想回報。