昨日東涌地皮拍賣，差點兒要收回，最後由南豐喺幾近冇對手之情況下投得，成交價比市場預期下限還要遜色，反映發展商態度審慎。尾市美聯集團（01200）沽壓尤大，埋單跌6%。睇怕樓市要提早兩個月抖暑，最高興嘅應該係等住入市嘅用家！

放大圖片

放大圖片

樓市受壓，拖累上、下游企業，鋼鐵股馬鋼（00323）及鞍鋼（00347）同跌逾4%。不過，市況波動，金價似乎唔多跌得落，昨日阿莊提及嘅金礦股瑞金礦業（00246）逆市升6.3%。

內地四月份CPI同比增2.8%，創十八個月以來新高，A股表現正在反映加息預期。市場下一個焦點，乃本月下旬嘅中、美戰略與經濟對話，且看雙方能否喺人民幣匯率問題上達共識。

內需股勝在夠穩陣

再看內地四月份數據，全社會消費品零售總額同比增長18.5%，令人確信內需股係較穩陣嘅投資對象，昨見青島啤酒（00168）、澳優（01717）均逆市高收，特步（01368）更逆市創五十二周新高6.68元，收報6.45元，升4%。

事實上，李寧（02331）及安踏（02020）現價往績市盈率分別為二十六倍及二十三倍，特步為十九倍，估值相對便宜。展望今年，幾家體育用品商都會進一步擴大銷售網絡，特步則選擇不在一線城市跟競爭對手惡鬥，而主攻二、三線市場，包括喺湖南、安徽、山東及四川等地，今年目標增加800至1,000家零售店，並計劃增加約5至8家旗艦店，策略可取。

聽聞剛過去嘅「五．一」假期，特步嘅銷售同比有雙位數字增長，消息支持股價，若短線回吐壓力不大，可乘勝追擊，目標7元，穿6.05元止蝕。

順帶一提，持倉中繼國壽（02628）派息除淨後，中國南車（01766）、廈門港務（03378）及平保（02318）派息亦將除淨，收息金額合共約3.45萬元。