本文重點
前i-Banker黃元山（Stephen）依家喺中大全球政治經濟社會科學碩士課程兼任講師，雖然佢個樣斯斯文文，但講到落手落腳做義工，佢真係義不容辭。好似最近Stephen與華富嘉洛證券營業董事黃偉康（Andrew）一齊搞咗個「投資達人Upper Class」，將課程收費扣除營運成本後嘅15%捐畀慈善團體─苗圃行動。
赴四川助災民 黃偉康力讚
黃元山三十出頭已退出金融界，現時過緊半退休生活，但就好熱衷慈善。Andrew笑話：「Stephen身價就似百億嘅上市公司，但佢肯放下身段常去內地做義工，有如上市公司私有化歸於平淡，係好值得我哋尊重。」
今日係四川大地震兩周年，Stephen期間已經去過當地三次做義工，「記得第一次去，我同幾個朋友都冇乜準備，喺成都買咗啲生活日用品，就帶去送比當地災民，現時就計劃喺今年九月再去第四次。」對此Andrew就爆響口話，試過叫Stephen帶埋佢去做義工，點知對方話驚佢唔捱得，不過都係講吓笑啫。