恒指五日跌1,188點，連2萬點心理關口都要失守，或許大市下一站有機會下試19,400點嘅二月低位，但如果可以忍受額外三幾百點震盪，此時此刻的確唔少基本因素良好的股份，排住隊畀你博反彈。內銀股係筆者首選，睇番早前出咗首季成績表，兼搵了任志剛做非執董的建行（00939），話就話上星期跟隨大市插水，但五日累積跌0.14元，報6.28元，跌幅比起唔少二三線股，真係溫和過溫和，睇番上周三四五的大跌市，三日建行都係低開高收，而且成交唔細，正正反映低位承接力相當強勁。

建行首季賺351.6億元（人民幣．下同），或者每股0.15元，市場估建行全年賺1,300億至1,350億元，市盈率唔夠十倍，以一家巨無霸國家銀行來說，估值其實一啲都唔貴。

希臘財困，歐洲投資市場草木皆兵，講唔埋反而會吸引更多資金東來，由基本因素或者技術走勢睇，建行都有一博價值，穩陣以三個月為目標，睇7元樓上一啲唔算過分。

建設銀行（00939）　目標價：7.20元　止蝕價：6.15元