查實從中央限制第二套房按揭指引曝光以來，四月中開始，內地樓市交投處於膠着，有樓嘅唔敢賣，怕賣咗之後買第二層做唔到按揭，無樓嘅則等樓價回落再算，今次恒大帶頭推倒第一塊骨牌，短期會否惹來其他內地發展商爭相倣效，齊齊要錢唔要貨？又或者買家入市興趣又再回升？相信要一兩個月時間去觀察。

最搞鬼仲係恒大星期三先剛剛上市夠六個月，唔少策略股東終於捱到禁售期結束，一個折扣賣樓消息，股價比招股價3.5元，打番個七五折，撻到落2.61元創上市新低，今次突然打折促銷，除咗班之前買咗樓，帳面坐緊艇嘅小業主外，班策略股東恐怕一樣煩緊係留定係沽。

歐洲經濟不容樂觀

希臘之後，評級機構預警可能輪到葡萄牙被降級，歐元區財務危機一浪接一浪，陰謀論者認為今次評級機構唔單止後知後覺，仲係存心搞搞震，要歐洲央行拯救計劃難度大增，姑勿論如何，歐洲央行無牙力，亦唔似○八年聯儲局救市般行動果斷，是落得今日手尾長的主要成因。

港股尋日直穿20,000點心理關口，最低見過19,888點，收市跌幅收窄，跌194點報20,133點，期指更係抽升至20,024點，撇除月內187點除息，是近期罕見的大高水格局。

另外，尋日現貨成交再升，去到815億元，是今年第二最高紀錄。筆者相信，只要歐洲事態不再惡化，恐慌拋售之後大市有機會反彈，今浪恒指由22,388點碌落19,888點，剛好2,500點，技術反彈目標將分別位於20,478點、20,843點及21,138點。

美國失業率高企無條件加息，歐洲仲大鑊，隨時要將剩番的1厘都減埋，去救救五隻歐豬國，年初歐美央行講退市，說穿了係得個講字，由近期歐美中長債息開始掉頭回落，可見零息日子，可能會陪伴我哋更長嘅時間。

今時今日，最安全其實係搵息率回報吸引，又可以享受到資產增值的投資，本來地產或者收租股都係唔錯之選，但八萬五在前，史提芬最驚今次政府又再矯枉過正，隊死樓市製造一班負資產苦主，故寧願搵反彈力度較細，以商業物業為主的收租股，領匯（00823）其實是相當吸引之選，從連日跌市其股價不為所動，可見唔少熱錢都視佢為避風港。

成為熱錢避風港

大行預期領匯一○及一一年度（三月結）每個基金單位派息0.972元及1.046元；以19.34元計，息率回報5.03厘及5.4厘，好過買樓收租多多聲。目下領匯舊商場翻新工作仍在進行，租金有較大增長潛力，每年只要租金及派息升5至7%，粗略計十年左右隨時可以收番本金，低息期間想保值，諗來諗去仲係領匯最安全。