希臘搞到一鑊泡，美資評級機構恐嚇葡萄牙可能係下一個被降級國家，陰謀論認為幕後係美國自導自演，以挽回市場對美元的信心，到底歐央行有冇新對策，仲係未知之數，但歐元插水，兌美元跌穿1.3重要心理關口，卻是不爭事實。
歐元跌，第一個反應好自然係拋售歐元收入為主的公司，時裝零售商思捷（00330）自然成為受害者，睇番由四月初希臘危機曝光至今，股價由63.5元插到最低51.2元，但尋日大跌市反而逆市回穩，升0.6元報52.3元，成交也是過去兩星期最多，反映恐慌拋售活動，或者告一段落。
歐元區佔思捷總收入八成五，尚幸無涉足希臘業務，而另外四隻「歐豬」也不過佔總營業額2%左右，如果單是基於歐元回落，看來市場是過分悲觀，儘管歐洲消費市場復甦緩慢，思捷頭三季營業額錄得1.8%的倒退，但因成本控制及毛利率改善，預期一○年純利只有單位數字的倒退，介乎44億至45億元，明年重新恢復增長，以十三至十四倍預期市盈率，對於一個有規模的時裝品牌而言，估值唔貴，而且係近十年最低水平，博反彈目標初步訂在56至57元。