正所謂「吊頸都要抖抖氣」，眼見昨日尾市亞洲時段美股道指期貨下跌，但港股跌幅仍收窄，加上撇除月內藍籌除淨因素，昨日期指收市實際轉高水約78點，相信有大戶平淡倉，呢轉跌得差唔多，短線反彈恒指阻力位喺20,500點水平。

放大圖片

放大圖片

阿莊尋日亦忍唔住手，以平均價0.7元買入40萬股中芯國際（00981），睇下周二公布首季度業績會否有好消息。此外，考慮到港務股表現令人失望，計劃沽出廈門港務（03378），喺5元樓下換入大福證券（00665）。不過，阿莊亦要補充一句，各位入市博反彈要量力而為。

市場消息指，恒大地產（03333）旗下約四十個樓盤以八五折促銷，股價即時「高台跳水」，低位見2.59元，收報2.61元，跌10%。有大型房企率先劈價推售樓盤套現，相信其他房企亦會倣效，配合中央政府持續收緊樓市「水」源，內房股都係避之則吉！

本來，要選防守性股份，港鐵（00066）都有得諗，但考慮到其物業發展收益存變數，抵銷了下半年可能提出調高鐵路客運收費嘅因素，所以都係另作他選。

供水業務收益穩定

粵海投資（00270）逾半收入來源供水業務，由於已跟特區政府簽訂東江水供水協議，今年相關業務收益有保障，加上供水業務提供可觀而穩定嘅現金流，照計唔應該睇得太淡。

粵投股價回落至3.8元水平，乃今年一、二月嘅支持位，理論上有一定支持，但當然，若股市出現不理性拋售，短時間內甚麼理論都用唔着。做定最壞打算，假設短線恒指反彈過後，下旬再展跌勢，下試一月份低位19,400點水平，則可候粵投下試3.5至3.6元才動手。