上海世博開幕之後，好多人都檢討緊，究竟係咪應該呢個時間去。不過，作為今次世博嘅電訊服務供應商，中電信（00728）亦想趁世博搞吓新意思，決定將下個月開董事會嘅地點，由原來嘅香港移師到上海，等班董事可以開董事會之餘，亦可順帶參觀世博。
王曉初帶團參觀
聽講，到時會由中電信董事長王曉初帶團，帶領一眾董事參觀世博園，而兩名獨立非執行董事秦曉同查史美倫，好似話已經報咗名參觀。
可惜太子無資格做中電信嘅董事，如果唔係，太子都第一時間報名。到時仲會唔會有咁多人搶住入場參觀就好難預料，但相信中電信一班董事應該可以暢通無阻咁參觀，順便試吓場內嘅通訊服務，係咪一樣咁暢通無阻。