傳過檔渣打開荒

呢大半年輪場人事變動真係好似車輪轉，太子有時都搞唔清楚邊個去咗邊度，睇嚟係時候畫個人事架構圖至得。Simon大概仲有兩個月就過完冷河，據講去渣打做開荒牛，幫手打造輪證品牌，所以依家正喺度叉緊電。

翁生另謀高就，另一邊廂法巴嘅股票及衍生產品部就有兩小花，即係兩位聯席董事趙海珠同郭小菱撐住，仲未有新老細上場，唔知兩小花可唔可以趁機上位擔大旗呢？

太子想同Simon求證吓過檔渣打嘅傳聞，佢點都唔肯講呢個傳聞係真係假，淨係話仲過緊冷河。佢前排先帶埋老婆同十五個月大嘅囝囝一齊外遊。依家已經返咗香港，但仲係成日同屋企人周圍去玩，享受天倫之樂。Simon同太子講，自己個BB初初出世嗰時明明係細碼，依家已經變成巨B，人哋望落去仲估佢有兩歲大添！Simon仲話，自己細個時一樣好高大，囝囝梗係深得真傳啦。