唔講唔覺，呢個月唔少股份股價都大走樣，就如中國建材（03323）及亞洲水泥（00743），昨日股價同創五十二周新低。再睇阿莊持倉嘅中航科工（02357），近月股價由高位4.1元回落至昨日低位3元，累計跌幅26%，真係睇到心都實！不過，考慮到現價累計跌幅經已有番咁上下，加上隻股基本因素未有大變化，所以都係選擇一動不如一靜。

放大圖片

放大圖片

無論係博短線反彈，抑或作中線收集，從國策股入手嘅勝算始終較高。喺乳品股之中，阿莊之前揸過蒙牛（02319），但考慮到去年業績表現遜於預期，暫未有翻兜打算。

進口奶粉享高毛利

再睇另一隻乳品股澳優乳業（01717），去年盈利增長表現突出，全年純利1.82億元（人民幣．下同），按年增長1.58倍。目前公司所有奶粉均由澳洲進口，旗下三個嬰幼兒奶粉產品系列，亦全部定位於高端價位，去年整體產品毛利率達49%，利錢可觀，難怪基金們都話走漏眼！

內地實施一孩政策，家庭收入趨升，消費能力增加，但對內地奶源嘅乳品信心需時恢復，故傾向選擇海外產品，這一點從每逢長假便見內地遊客來港掃奶粉可得到印證。澳優銷售海外奶粉嘅策略，正好迎合消費者嘅需求，但當然，海外奶粉供應嘅穩定性，亦可能成為風險因素。

澳優喺去年度業績中披露，正就投資海外奶粉生產業務進行洽商，且看季內會否有進展。澳優昨收報5.22元，跌2%，中線喺5元邊有得諗，目標先睇5.8元，止蝕位4.75元。