本文重點
今時今日，企業要挽留人才，除咗用銀彈政策之外，仲要諗吓其他計仔。好似作為本港最大僱主之一嘅滙豐銀行，為咗增加一眾員工嘅歸屬感，日前就喺中環總行為個人理財業務員工，同佢哋嘅親友舉行咗個嘉年華，當日仲有高層同員工玩遊戲，實行上下齊心打成一片。
今次呢個嘉年華吸引超過1,600人參與，而啱啱今年二月「新官上任」嘅滙豐香港區總裁馬凱博，同埋滙豐香港區個人理財業務主管麥倩華亦有到場。
馬凱博落場比賽
滙豐當日設有好多遊戲攤位。不過，最有睇頭嘅莫過於數銀紙比賽。
馬凱博同麥倩華雙雙落場參與比賽，同數銀紙「高手」嘅前線員工一較高下。正所謂贏輸唔緊要，佢哋兩個都係志在參與啫。單係睇佢哋兩個數銀紙時落力嘅神情，夠晒娛樂性。