本文重點
果真如市場所料，長假期間中央政府真係例牌「做嘢」，前晚人行宣布，調升金融機構人民幣存款準備金率0.5個百分點，乃年內第三次。日股及內地A股昨日尚在休市，港股交投淡靜，恒指曾低見20,773點，收市報20,811點，大市成交不足500億元。
澳洲擬開徵40%資源稅，消息對喺當地投資資源業務嘅上市公司股價造成打擊，兗州煤業（01171）急挫6.2%；中信資源（01205）跌4.3%。藥業股又成翻炒對象，中國製藥（01093）重上6元樓上，武夷藥業（01889）及聯邦制藥（03933）均升逾5%。
市場預期，本周歐盟將出手拯救希臘，但市場反應尚不明朗，料短線市況持續反覆偏軟。游資缺乏炒作對象，不排除會轉攻新股，其中雷士照明（02222）將於本周五起開始招股，聽聞獲中信證券入股作基礎投資者。
講開雷士照明，其實賣點不離具環保概念嘅LED照明產品，喺環保潮流下，LED（發光二極管）長壽、節能嘅特性，遠較傳統照明產品環保，就連中國近年都積極鼓勵使用LED產品。
LED食正環保潮流
講到呢個「環保照明」概念，影子股有真明麗（01868）。去年公司擴建LED封裝廠房，每月產能達8億個LED，其中大功率LED可達至每瓦100流明，為LED產業可量產嘅最高水平。此外，去年新芯片廠已投產，公司可自產LED芯片，形成涵蓋LED上中下游嘅完善產業鏈，有助縮短交貨期。
昨日真明麗股價逆市上升2.95%，高位曾見5.75元，收報5.58元。若短線能企穩喺50日線（5.65元）樓上，有望突破降軌，下一阻力位喺6.2元，穿5.15元止蝕。