喺頒贈儀式前，馬凱博先來個開場白，以廣東話「大家好」向在場人士問好，氹得大家好開心，佢嘅簡短致詞又不忘介紹獅子銀行，問在場人士知唔知獅子行名稱包含了兩個城市，除咗香港，另一個係邊個？有個學生好快就答上海，馬凱博好識做咁問係邊個答中，佢可以獲得獎學金，令到學生們不知幾雀躍，到底會否落實就唔知喇？

面對一班年輕嘅中學生，馬凱博乘機讚佢哋係香港嘅未來；坐喺前排，有番咁上下成熟嘅嘉賓，馬凱博就形容佢哋係香港嘅昨天，唔知呢班貴賓被形容為過去式有何感受呢？不過現場都充滿笑聲。

滙控薪委主席也捱轟

馬凱博如果撞到滙控行政總裁紀勤，都真係要安慰吓對方。事關近日滙控高管花紅過高嘅抨擊沒完沒了，繼紀勤嘅80萬英鎊遷港津貼捱轟後，即將擔任滙控董事薪酬委員會主席嘅獨立董事約翰桑頓（John Thornton），亦被質疑每年酬金達104萬英鎊過高。

雖然滙控辯護指，桑頓嘅酬金同其他美國大銀行類似職位相稱，但滙控嘅股東就擔心咁樣會影響桑頓作為獨立董事嘅獨立性。