上周志強都發覺唔少二三線股走勢轉弱，幸而投資組合僅只持有光大國際（00257），現金水平較高，趁大市調整，可以慢慢收集優質股，待大市回升享受較高回報。

上個星期港股反反覆覆，唔少股仔疲態盡現，國中控股（00202）係少數能逆市做好股仔，相信係其股價經一輪調整後，現水平已吸引投資者入場。上周國中控股宣布配股，但股價竟能逆市上升，主要係內地環保及水處理業務近年甚得基金歡心，自然對國中投信心一票。是次國中以每股0.65元配股集資2.86億元，用作發展環保及污水處理業務，集團亦正尋覓合適的項目作收購。國中除咗業務前景吸引外，集團所持有黑龍江國中A股七成股權，市值達23億元人民幣，遠超於國中本身約19多億港元的市值，現價未完全反映其實際價值，令國中在配股後仍能節節上升。

單係計及所持A股市值，國中以現價計算，已有高達20%的上升空間，就算打番個折扣，股價上番1元亦好合理。