本文重點
五一長假期間，不少內地居民湧港消費，本地零售股受惠。周生生（00116）剛進行配股集資，阿莊記憶中，呢間老牌金飾零售商過往較為低調，今次配股集資，目的係要大搞內地市場，以其品牌優勢，唔難吸引機構投資者捧場，可以趁短線回吐留意上車機會。
上周五美股道指急挫逾百點，睇怕港股今日難免一跌。五月初股市走低已成定局，其後中美經濟峰會會否帶來轉機，令本月股市先跌後回升，人民幣升值與否勢成焦點。
講到人民幣升值，內地航空股係必炒對象。論高風險高回報，當選東航（00670）及南航（01055），事關業績差，負債高，難論估值，炒起上嚟大家可以鬥「癲」。若然係炒還炒，都想穩穩陣陣，就當然係揀有基本因素支持嘅中國國航（00753）。
經營表現跑贏同業
國航今年首季經營情況良好，錄得淨利潤21億元人民幣，佔同期全國航空業淨利潤逾半比例，可見經營表現冠全行。管理層表示，季內內地航線票價穩定，國際航線首季有3至5%升幅。如此看來，相信今年整體票價可保持穩中有升。至於油價波動問題，去年公司進行燃料套期保值策略，成效顯著，今年續有撥備回撥，管理層控制成本得宜，足叫人投信心一票。
喺三大航空公司之中，相對於東航穩佔華東市場、南航穩佔華南市場，過去國航局限於北京及西南部，內地航線基礎較弱。不過，去年國航成功增持深圳航空至擁有控股權，有助加強華南地區航線，完善及強化全國及國際航線版圖，策略意義深遠。
上海世博已開幕，至十月底才閉幕，料吸引不少外地遊客來華，配合經濟持續穩步復甦，作為內地航空業翹楚，國航嘅客運業務應可受惠。今年業績展望樂觀，人民幣升值將為股價加添動力，料可反覆向10元關推進，50日線支持喺7.5元。