相信最初沒人想到，希臘千方百計耍盡財技騙入歐元俱樂部，會搞到成個歐元區一鑊泡，事實證明各國制度有別，經濟情況迥然不同的經濟體，用單一貨幣綁在一起，太平盛世時問題唔大，但遇上逆境，矛盾就會出晒嚟，無論最後點收科，幾可肯定大團圓結局機會唔高。

內房股成逆市奇葩

外圍壞消息多籮籮，儘管聯儲局不厭其煩，再將「低息會持續一段時間」當作早課誦經唸多一次，也無助港股扭轉弱勢，恒指尋日再跌170點，收報20,778點，成交升至633億元。由藍籌到二三線股，跌勢都相當全面，市場瀰漫住少少要錢唔要貨的恐慌味道。不過，炒家賭中央壓抑房地產炒風的措施，未必會在外圍立立亂之下加碼，內房股反而成了跌市奇葩，但睇走勢，今次有機只係調整浪中的一次反彈，入市揀龍頭股比較安全，筆者心水包括中海（00688）、富力（02777）及龍湖（00960）。

中央銳意向基建投入銀彈刺激經濟，加上近年關掉規模效益欠佳的中小型水泥廠，令水泥市場供過於求的缺口，於去年下半年逐步收窄，有幾家主要水泥企業的季度業績，受惠價格回升、水泥產出利潤改善，業績多見反彈，沉寂多時的水泥股，當有留意必要。龍頭股安徽海螺（00914），去年賺35.06億元（人民幣．下同），較○八年回升34.5%，今日股息同10送10紅股除淨，尋日股價逆市升1.2元，收報49.45元，看來想收取紅股的散戶捧場客為數不少。

論基本因素，海螺正和水泥行業齊齊步出谷底，剛公布的首季業績，受國家固定資產投資帶動，期內產品銷售價格與銷量同時上升，股東應佔溢利7.92億元，比去年同期勁升93.8%。

估值較同業享溢價

綜合大行預測，今年海螺全年賺47.77億元，暫時首季成績僅及全年預測數字的16.6%，但考慮到市場預測水泥價格下半年漲價空間較大，估計全年業績達標機會唔細。以H股價計，海螺市值773億港元，相當於一○年十四倍市盈率，回顧這水泥龍頭股，估值從來都比同業有相當高溢價，過去五年市盈率介乎十至五十二倍，平均大約在二十二倍附近，目前有三成六折讓之多，加埋行業周期才剛走出深谷，現時估值都幾吸引，50元樓下入貨，風險應該唔大。