港交所（00388）資料顯示，外資基金DJE減持理文集團（00746）118.8萬股，平均價6.69元，持股量降至4.95%。據講原來該基金持有理文嘅股票價值超過單一股票佔基金資產比例10%嘅上限，即係話買過龍，所以要沽番啲出嚟，而唔係睇淡隻股。

講開理文，近年公司嘅化工業務發展一日千里，最近公司向執董李文恩授出8,250萬股認購權，行使價6.69元，但行使條款係未來四個財政年度公司淨利潤將較去年度有15至60%嘅增幅，以此推算，保守估計現價今、明兩年預測市盈率分別為二十倍及十八倍，估值合理。

內房靠穩或有啟示

本周末係「五．一」黃金周，有說內地財金部門喜揀長假期前作出大動作，故不排除今日收市後人行或有加息行動云云。係真係假，只能做事後孔明，但睇昨日內房股逆市靠穩，雅居樂（03383）及中國海外（00688）分別升3.8%及1.6%，似乎係反映人民幣即將升值多於加息。

正正由於市況波動，資金流向防守性股份，如內地公路股。四川成渝高速（00107）去年純利增長39.86%至8.27億元人民幣，而今年首季純利同比增長67%，反映業務保持增長勢頭，消息對股價起支持作用。

基本上，公司旗下嘅成渝、成雅、成樂及城北出口高速及青龍場立交橋收益穩步增長，收購遂渝高速四川段及成南高速嘅交易，有望喺年內完成。另外，已落實興建成仁高速，為未來兩、三年嘅業務增長鋪路。此外，本月中旬，公司參與四川省政府組建嘅四川省交通投資集團，未來將有更多機會參與投資西部運輸基建項目。橫睇豎睇，可繼續視之為首選公路股。