24/04/2010

播放本新聞相關短片
查詢股票編號

麥博士見粉絲有求必應

本文重點
有「新興市場之父」之稱的鄧普頓資產管理執行主席麥博士(Mark Mobius),一向都好肯講意見,所以好受歡迎,尋日佢有公開演講,吸引唔少粉絲捧場,包括太子在內。好多粉絲見過佢真人之後,都大讚佢好人,又冇架子。

麥博士有個花名叫光頭博士,形象非常鮮明,佢身為鄧普頓掌舵人,成日要飛去唔同嘅地方見人,好難得佢尋日來港演講,大會安排咗簽名會,順便推介佢撰寫嘅書。

爭住合照攞簽名

麥博士都出過好幾本書,太子都有買,但獨欠佢親筆簽名,所以趁機補番個,估唔到佢非常細心兼有耐性,直情係和藹可親,好多粉絲爭住叫佢簽名同合照,影完相又加一、兩條問題,佢都有求必應、有問必答,似足黃大仙。

有人向麥博士自我介紹、主動交換卡片,麥博士嘅卡片好快乾塘,但佢非常細心,喺對方卡片嘅角落頭打個「X」符號,話遲啲會電郵番個聯絡方法,非常重視每位來賓。

太子又發覺,麥博士都幾鍾意食甜嘢,當太子問問題時,佢會把握時間喺自助餐枱拎甜品食,短短兩三條問題,佢已經食咗兩款甜品,而且仲勁落cream添。