尋日恒指高開低收，跌112點，報21,511點。昨日指數早市見過21,740點，技術上，21,582至21,788點的下跌裂口大致補回，而內地加強壓抑樓市炒風的措施及高盛事件也獲市場充分消化，21,200點支持與21,800點阻力邊一面首先破關，會係短期大市發展關鍵。

同朋友傾開話女人錢較易賺，睇睇外國一線名牌，毛利率閒閒哋有七至八成，意味着花5,000蚊買個手袋，有4,000蚊係為咗品牌溢價同虛榮心。睇番香港，都有八成以上毛利的品牌，好似女裝服飾公司寶姿（00589），去年中期毛利率就高達81.5%，認真厲害，亦因為咁，筆者特別留意賺女人錢的公司。簡單而言，毛利率高低和品牌商譽價值、產品顧客定位有直接關係，筆者的基本要求係50%以上的毛利率。

毛利率穩步提升

早前推介過內地鞋王百麗（01880），另一主攻女裝鞋的公司達芙妮（00210）上星期亦公布業績，賺3.94億元，倒退20.1%，每股盈利24.05仙，派末期息5仙。公司因為發行認股權證，令股價與換股價之間的差距變動計入損益表內，如撇除此數，實際營業額升10.3%，溢利升21%，成績查實唔錯。

值得高興的是，期內毛利率由前年的52.7%升至55%，儘管由主打女裝鞋款的「達芙妮」，逐步增加較低檔次的「鞋櫃」比重，以為毛利會有多少壓力，但事實卻並無影響。現時兩個系統的零售點，分別有3,363個及813個，今年目標分別增加500個及250個。

達芙妮一○年市盈率19.3倍，比百麗的二十五倍平兩成三，內需股中估值算幾吸引。唯一要彈嘅，可能係業績的透明度相對較低。另外，去年引入TPG基金，發行的5.5億元人民幣二○一四年到期可換股債券，令業績要每年受CB行使價與股價之間變化的影響。查實現價8.48元，比行使價3.5元高出一大截，最理想係TPG能夠提早行使，亦可反映對這間公司的長遠承諾。總結係值得買，只嫌短期升幅唔少，如可回吐到7至7.5元，會買得比較安心。