22/04/2010

播放本新聞相關短片
查詢股票編號

股海實戰:霸王高處未算高

港股繼續牛皮偏軟,中央及特區政府齊齊出招打擊樓市炒風,地產股暫失上升動力,某程度抵銷咗憧憬人民幣升值嘅利好因素。其實,中、港兩地樓價繼續上升,只會脫離實體經濟,一旦泡沫爆破,對整體經濟造成嘅打擊,可能比「九七」更糟,故阿莊認為,政府採取果斷措施壓抑樓市炒風,避免樓市「硬着陸」拖垮經濟,對整體社會係有益無害。

正正因為少咗一瓣主要股類炒作,游資惟有繼續集中火力主攻內需及藥業股。上周二本欄推介嘅中國製藥(01093)急升近一成,收報5.83元;而雨潤食品(01068)股價亦創五十二周新高,收市報26.25元,升4.17%。

可惜嘅係,上周阿莊沽出嘅晨鳴紙業(01812),昨日曾高見8.32元,收報8元,升11%。雖然阿莊都係贏錢走,但實在估唔到隻股後勁咁強,應唔應該睇位「翻兜」,且看今日公布嘅業績表現有冇新啟示。

講開內需股,專營洗頭水業務嘅霸王國際(01338),去年七月先至在港掛牌,招股價才2.38元,估唔到一年未到,現價已經喺6元樓上,市值高達177億元,真係唔簡單!

睇番最近霸王宣布嘅去年度業績,全年收入17.56億元(人民幣.下同),純利3.64億元,增長約29.2%,每股盈利0.15元,派發末期息每股4.25仙,另加特別股息每股4.25仙。業務表現大致符合市場預期,而刺激股價迭創新高嘅動力,乃公司有多項新發展,包括近期喺廣東省租用地塊種植中草藥,預計可於明年開展種植,即係話做埋上游業務。

產品組合多元發展

另外,本月公司推出一款新嘅中草藥飲料系列產品─霸王涼茶,結合現成以「本草堂」為品牌嘅中草藥護膚產品系列,其下游產品組合呈多元化發展,一條龍傳統中草藥消費品業務經已成形,概念獨特,而且正好迎合內地消費者口味,銷路無憂,難怪投行紛紛唱好。睇霸王嘅業務擴展步伐,再綜合多家投行嘅睇法,現價估值高處未算高,年內股價目標坐7望8,5.5元乃主要承接區。

阿莊