本文重點
中港兩地嘅股民數目與日俱增，為咗令佢哋有更多「實習」機會，好多券商都會搞模擬交易比賽，等佢哋可以顯身手，又可以測試一下實力。最近騰訊控股（00700）旗下騰訊網、信誠證券同埋捷利資訊聯合舉辦嘅二○一○港股模擬交易比賽，已經喺四月十二日展開。有個得意現象就係內地參賽者最多，亦最鍾意投資仙股，莫非想博大回報？
百萬本金八日倍升
比賽為期一個多月，直至五月二十日完結，所有騰訊網嘅QQ用戶都可以參加。暫時領先嘅都係內地參賽者，股票組「冠軍」成功將模擬本金100萬元滾到201萬元，以八個交易日就攞到一倍的回報；窩輪組「冠軍」更把資金滾至279萬元。睇嚟參賽者炒股技術超勁，當然最終係咪成績咁勁，要睇到截止日至知。
信誠證券中國業務總經理蘇祖浩就話，今年比賽分股票組同窩輪組，各組每名參賽者會有100萬元模擬本金。勝出者可得到10多萬元現金獎賞，獲最高人氣排名參賽者可獲iPhone手機。