港股早段裂口低開，午後內地股市跌勢加劇，恒指一度失守21,300點水平。志強都算好彩，開市無耐中國環境資源（01130）竟逆市上升，故率先以0.123元沽出200萬股，大跌市仲有錢贏，真係要好好慶祝。

大市連續兩日急跌，高位計恒指回落近千點，或可喘定反彈，志強留意番稍為大晒士股份，預期反彈可快人一步。光大國際（00257）昨日曾低見3.85元，收市前股價重上3.94元，力保不失，現水平可開始收集，作為中線投資。

光國較早前公布○九年業績，若扣除一次性非經常收益的因素，核心業務實際增長24%，反映其環保項目已步入收成期。

多個項目陸續投產

此外，光國去年取得10個新的環保建設項目，聯同年初至今取得的額外3個，合共13個項目，投資額達32億元人民幣，將在未來兩至三年內建成，屆時營業額將大幅提升。

光國現價歷史市盈率約三十六倍，睇落高咗些少，不過由於集團多個項目將於今年陸續投產，可接受一定溢價，今年預測市盈率將降至二十四倍。志強考慮於3.8元附近開始收集，跌穿3.6元止蝕，中線目標4.5元。