筆者個人認為，中央只係想樓市升勢放慢，而非整死樓市，而且正所謂上有政策下有對策，周末睇內地網絡討論區，唔少精明準業主與炒家經已就新政諗出唔少應對方法，最直接就係用親友名義買第三套房，筆者心諗，如果內地銀行肯將已升值的第一、二套房加按，新政策就完全起唔到作用。姑勿論點，內地對高樓價民怨日深，今次中央出來擺一擺姿態，主要係想畀人睇到政府有冷卻炒風的決心，最理想當然係未來幾個月樓價數據持平或者輕度調整，但這個明顯唔係一個看淡股市嘅有力理由，趁住市況波動，反而可視為理想的買貨機會。

上市三年盈利翻兩番

中國高速傳動（00658）業績唔錯，尋日逆市升0.8元，收報17.06元，成交接近2,000萬股，乃今年第二高紀錄，看來市場對有消息有概念配合的熱門股，仲係相當有興趣。

這風電設備供應商，是中央推動輕碳經濟，大力鼓勵風能等可再生能源下的受惠者，去年業績在風力傳動設備錄得1.1倍銷售增長下，賺9.66億元（人民幣．下同），增長接近四成，撇除可換股債券公平值變動的一次性影響，實際盈利更勁升1.29倍去到11.06億元，鋼材等原材料價格回落，也令毛利有相當的改善。回顧上市唔夠三年，中傳動業績由○七年的3.07億元翻了兩番，難怪估值長期居高不下。

去年，核心業務風力齒輪傳動設備銷售升1.11倍，佔總收入六成七；傳統齒輪傳動設備增長介乎0.5%至72.3%，唯獨較側重出口市場的船用傳動設備，因金融海嘯關係銷售跌了47.3%，但考慮到佔整體收入唔到4%，影響有限。

風電場屆投產高峰期

早前曾經和一間風場企業管理層傾過，同預期差不多，目前政府希望長遠達到減排目的，在火電投資的審批上，相對嚴謹。造就對環境損害低的可再生能源建設，現時全國風電佔總產電量雖不足1%，但過去一年投資建設的新發電廠卻佔電力市場總投資一成以上，可以預期，未來幾年是風場投入營運的高峰期。

但由產業鏈去考慮，一旦開始營運，風場經營商回報增長就要靠擴大風場規模，在利息上升周期，股本回報很難有大改善，故筆者認為吸引力反而不及組件供應商。事關無論組裝期，抑或風場營運一段時間後需要維修，都涉及齒輪傳動組件更替，唔愁無生意可做。中傳動預期市盈率十六倍，比供應鏈上游與下游公司如龍源（00916）等都要低，值得留意。