本文重點
今年最矚目新股之一嘅英國保誠，來港上市計劃正籌備得如火如荼，傳聞保誠今個星期四會進行上市聆訊。接近監管機構消息就話，為咗要有多啲時間審閱佢嘅上市申請，上市委員會將「加班」，提早喺今個禮拜三開始就保誠進行上市聆訊。
上市委員會「加班」或提早作初步審閱上市申請，時有聽聞，所以大家都不感意外。咁又係，保誠未「買起」AIA（友邦保險）前，AIA諗住來港上市，集資額更有機會打破紀錄。港交所諗住省靚招牌，點知後來殺出一個「程咬金」。好彩保誠為咗可以順利完成供股，決定先來港上市後始進行供股集資收購AIA，呢間巨型保險企業「兜過圈」始終都來港上市。
倘聆訊過關 下月掛牌
保誠size超巨型，文件多多，上市時間又緊迫，因為下個禮拜四（二十九日）英國開市，就要公布供股嘅細節，所以香港上市時間要好好把握。依家計劃係如果上市聆訊順利「過關」，會喺五月四日或者五日上市。