阿莊三月下旬指出，工業股復甦概念強，並曾推介億和（00838），當時做價未到2.4元，上周五該股已衝穿3元關，收報3.17元，可見捉正方向。

放大圖片	放大圖片	放大圖片

此外，阿莊持有嘅晨鳴紙業（01812），上星期升勢甚速，周五收市報7.33元，成交明顯增加。鑑於短線已累積一定升幅，故上周五以7.4元沽出8萬股，套現59萬元，獲利10.8萬元。

農業股宜高度關注

近月資金重新流入股市炒作人民幣升值概念，游資主攻落後股，如工業股、藥業股等等，反而內房股喺政策因素影響之下，股價仍普遍向下，上周五內房股跌勢尤急，就連實力股華潤置地（01109）及中國海外（00688）股價均同跌逾4%。阿莊始終認為，內房股面對政策風險，博反彈風險高，都係唔好亂沾手為妙。

游資下一炒作目標係咩？阿莊認為，係時候留意吓農業股，事關中央政策對於農業發展嘅高度支持毋庸置疑，跟炒醫改概念一樣，農業概念隨時都可以翻炒。

受惠年初以來，大豆、小麥等農產品價格回穩，從事生產、加工及分銷農產品嘅中糧控股（00606），毛利率可望回復穩定，相信今年上半年整體業務將較去年上半年及下半年好。未來兩年公司將致力擴產，目標係兩年後年收入可翻一番，另外，今年有機會獲母公司注入包裝業務，相關進展可成為刺激股價突破嘅催化劑。

再看其股價經已橫行了好幾個月，10元這個支持位應該經得起考驗，建議可以趁靜局分注收集，博季內呈突破，目標再向13元推進，穿9.4元止蝕。