同一時間，由於人民幣並非自由兌換貨幣，而內地企業及居民實際投資選擇唔多，唔係炒樓就係炒股票。長遠發展落去，結果只得一個，就係政府雖然想打壓，但卻顯得有心無力，溫總提出要加快研究住房消費稅的可行性，務求將火熱的樓市立即推入雪房急凍，但內地業界對住房稅的成效卻係抱懷疑態度，最可惜係內房股，在○九年強勁業績加埋一○年第一季強勁的銷售數字下，股價仲係無動於衷，跟利好消息背道而馳。

美低息期有排拖

A股腳軟，港股自然受牽連，恒指連續第四日開高走低，升36點，報22,157點。業績期過咗，港股本身缺乏消息，短期恐怕會繼續睇祖國股市做頭，今日滬深300指數期貨登場，會吸引更多炒家進場，抑或繼續觀望氣氛濃厚？相信唔使幾耐會有答案。

相比之下，近期美股的確勢如破竹，道指輕取萬一點心理關口。綜觀多項經濟數據，美國三月零售銷售升1.6%創四個月高位，好過經濟學家預期嘅1.2%，二月數字也向上修訂到0.5%；同月消費物價指數卻得0.1%升幅，顯示通脹溫和到極。連埋早前公布的非農業就業職位，創接近三年來最大增長紀錄，三組數字告訴我們，失業情況開始改善，佔美國經濟比重三分之二的零售業開始好轉，最重要係，通脹仲係相當之低，伯南克有條件讓低息期有咁長拖咁長，到通脹復燃至算（雖然新加坡已頂唔順，率先讓貨幣升值）。種種因素結合，對美國營商企業絕對有利。

業績隨時有驚喜

利豐（00494）、偉易達（00303）及德昌（00179）等做美國生意嘅公司，過去一年股價升唔停。相對而言，作為全球最大電動工具生產商、主攻北美大型連鎖零售的創科（00669），股價在6至8元之間橫行接近三季，近日終見炒落後，兩日累積升近一成二，相信是春江鴨憧憬今日公布的業績，會有令人喜出望外的表現。

創科最輝煌的時間在○五年及○六年度，年賺超過10億元，但一場次按風暴下，美國樓市成為重災區，對主力產銷家居電動用具的創科影響甚深，加上要解決早年擴展過度帶來的債務問題，○七年及○八年業績跌到1.25億及1.74億元，但○九年上半年創科賺2.57億元，已現轉機，綜合大行估計，全年盈利約6.38億元，標誌着業績步出谷底，以18.5倍的市盈率，跟海嘯前平均20.5倍估值比較，有一成折讓，考慮到○九年只是行業周期轉捩點，目前股價應該仲有唔少上升空間，今日業績曝光如果差距唔大，有一捧價值。