海澱主席韓國龍尋日就同太子分享呢啲奢侈品嘅體驗，太子覺得大陸嘅物業已經變成奢侈品，韓主席應該好睇好，點解唔集中搞房地產？佢話做地產好攰，於是搞其他奢侈品。

佢哋今次攞到公主遊艇國際公司喺香港嘅獨家分銷權。話說有次佢想買隻遊艇，走去外國選購，之後睇中咗公主遊艇嘅產品，係一隻過千萬港元、長62呎、有3間睡房嘅遊艇。佢認為呢盤生意有得做，所以就斟咗個代理權返來。

點解咁有信心？韓生同太子解釋，佢會針對係香港住嘅內地富豪，因為如果買隻遊艇返大陸，打稅可以係幾十個巴仙，運嚟香港就平好多，只要攞番個中港牌照，鍾意泊喺香港又得，駛入去內地港口又得，加上香港天氣好、海港靚，又唔會冰天雪地，真係全年都用得着架遊艇。而且公主遊艇暫時未係香港嘅主流遊艇，增長空間可以好大。

旗下兩國產錶響名堂

遊艇生意係咪真係咁大發展，仲要畀啲時間睇，不過佢哋代理國產名牌錶依波（EBOHR）同羅西尼（Rossini），就真係做得好出色，淨係呢兩個牌子，已經成為好主要嘅收入來源，佢哋仲打算擴大銷售網，將舖頭數目由1,800間增至3,000間。

據講呢兩隻品牌佔大陸國產錶市場45%，最架勢就係，兩隻牌子已被世界品牌實驗室（World Brand Laboratory）選為「中國500最具價值品牌」及「亞洲品牌500強」。