14/04/2010

播放本新聞相關短片
查詢股票編號

國壽海外請客睇姚明

姚明魅力沒法擋!話說中國人壽海外公司慶祝成立二十五周年,請咗班客戶去美國睇NBA比賽,當佢哋去攞簽證嗰陣,領事館啲人問其中一個得獎者去美國做乜,佢話去睇波,於是領事館問佢識邊個球星,佢話淨係識姚明,咁就通過咗出名麻煩嘅攞簽證程序。

與劉廷安分屬老友

國壽海外安排睇嘅比賽就係休斯頓火箭對洛杉磯湖人,可惜姚明傷咗都有一段時間,要下季至可以復出,所以佢哋淨係可以睇到姚明坐喺後備席,不過睇唔到姚明場上英姿,都可以睇高比拜仁補數。

而且作為國壽代言人嘅姚明都有坐低同班得獎者傾吓偈。姚明仲特登叫咗佢啲經理人帶佢哋去自己喺休斯頓開嘅中菜餐廳食餐勁嘅添。

唔講唔知,原來國壽海外總裁劉廷安喺國壽(02628)嗰陣,就係佢負責同姚明拍廣告,所以兩人一早好老友,今次劉總雖然冇去美國,但係都託咗人帶份小禮物去美國,送畀姚明就嚟出世嘅囡囡添。