上市公司嘅年報通常都好嚴肅，不過尋日太子見到今個月二十號就會以介紹形式掛牌嘅置富產業信託（00778）本年報就好特別，入面滿載兒童畫嘅插圖，好有創意！
趙國雄「揸砵砵車」
置富產業信託主席趙國雄話，由於佢哋旗下物業多數都喺屋邨商場，所以想活潑啲、輕鬆少少，唔想咁死板。
例如置富董事會八位成員咁，好多公司都係整張證件相上去，置富就花咗啲心思，喺下面加架車仔，等啲董事好似揸緊車咁，趙國雄揸嗰架仲係紅色「砵砵車」。
其餘年報入面亦都加咗唔少全版插圖，描述商場嘅日常景象。而太子最欣賞係當年報講佢哋嘅租客組合時，加咗好多標誌落去，例如用個漢堡包代表餐廳等。