唔少財金界人士都話，上市公司年報絕對係一本可讀性甚高嘅財經讀物。不過，佢哋通常都會附送一句：「不過會好鬼悶㗎！」的而且確，每年三、四月，都係上市公司出年報嘅高峰期，太子都會特別留意上市公司高層嘅人工，但其他嘅嘢，又真係幾鬼悶。
中電信（00728）今年就搞下新意思，為配合公司創新同追上潮流嘅風格，佢哋○九年嘅年報就引用咗最新嘅增強實境（Augmented Reality）科技，融合傳統媒體同最先進嘅現代科技，去突出今年年報「引領變革」主題。 Augmented Reality係物聯網嘅一項應用，响外國營銷推廣應用方面非常受歡迎。當中電信股東收到年報嘅同時，會隨年報收到一書籤，股東只要將印有中電信logo嘅書籤對住電腦嘅web cam（網絡攝錄機），中電信嘅網頁就會播出一段3D動畫，去表達公司全業務經營所帶來嘅新景象同前景。雖然呢項技術响外國已經好流行，但响香港就好似仲未普及。今次中電信引用喺年報上，算係上市公司中嘅首創。
王曉初收入減六成
順帶一提，中電信董事長王曉初舊年嘅收入，因獎金減少同無咗股份基礎報酬，收入較前一年少咗61%，至73.4萬人仔。