本文重點
港股喺22,000點關前整固，恒指昨日跌61.73點。前日熱炒嘅國企股要抖抖氣，輪到大落後嘅中移（00941）接力，高位見77.95元，收市報77.75元，升1.7%，而港交所（00388）亦升至139元。睇嚟呢轉最落後嘅係滙控（00005），昨日收報79.55元，可留意相關認購證。
天津港（03382）去年盈轉虧，蝕逾4,000萬元。不過，睇番去年嘅外貿情況，及收購天津港股份產生一定嘅整合支出，業績欠佳係預期之內。反而管理層表示，今年有望扭虧，令股東稍為安慰，故決定繼續持貨。
呢個月股市嘅主題係人民幣升值，資金重新流入港股，大量熱錢搵嘢買。高負債嘅南方航空（01055），喺憧憬人民幣升值下，可望還少好多債，昨日股價再升2%。但阿莊偏愛國航（00753），事關同樣可受惠人仔升值，且基本因素勝同業，揸得安心，趁近日股價調整，可留意低吸機會。
人仔升值獲益匪淺
同樣可視為人仔升值得益者嘅仲有神州數碼（00861），事關公司買貨用美元，但產品主銷內地，收嘅係人仔。以○七至○八年人仔明顯升值為例，神數喺○七年及○八年度（三月結）分別錄得匯兌收益1.09億元及2.93億元。若然人仔真係再漸進升值，以神數目前年度營業額已較○七年度翻一番計，受益程度將會更大。
再睇神數截至去年十二月底止的首三季度經營業務現金淨額達11.26億元，現金流可觀，而十二月份營業額更創下單月歷史新高，估計全年度業績可保持雙位數字增長。此外，神數嘅分銷及系統業務已具備分拆到A股上市嘅條件，且看今年呢方面會否報佳音。
近年，此股開發新業務嘅能力亦獲認同，備受基金鍾愛。集團早前更與八達通就拓展內地市場展開合作，值得期待。以現價計，預測市盈率喺二十倍樓下，實屬值博之選。