本文重點
長假後，港股一如預期走高，恒指一度逼近22,000點，大市成交明顯增加至891億元。市場憧憬中國將讓人民幣恢復有序升值，債高嘅航空股成炒作對象，南方航空（01055）升逾5%；內銀股建行（00939）亦升4%。另外，內地十八個部委聯手淘汰九大行業落後產能，龍頭企業漁人得利。江銅（00358）及中鋁（02600）分別升逾5%及4%、神華（01088）及中煤能源（01898）同升逾4%。阿莊上月下旬推介嘅國藥控股（01099）走勢勝於預期，昨日再升5.35%，睇怕呢轉40元冇走雞！
昆侖能源走勢對辦
上周三阿莊提及嘅昆侖能源（00135）走勢亦對辦，昨日收報11.38元，升4%，已上車者，可以穩坐釣魚船。再看另一巨頭中石化（00386）旗下在港上市嘅中石化冠德（00934），自今年一月中股價喺2.5元水平起步，升至上月中接近5元便進行整固，昨日再現大陽燭，收報5.36元，升10%。
跟昆侖類似，中石化冠德本身都係紅籌，而母公司就係大國企。昆侖自打正旗號做中石油（00857）嘅下游燃氣分銷業務旗艦之後，股價脫胎換骨，若然中石化有心善用中石化冠德呢個平台，相信後者股價亦可以有突破表現。
睇番資料，依家中石化揸住中石化冠德72%，若然真係有注資行動跟尾，以中石化現貴為全球第三大加油站營運商，單係營銷及分銷業務一年經營收益超過300億元人民幣，牌頭夠晒大，而中石化冠德現時市值僅56億元，股價再炒高三、五成又有幾出奇！當然，現階段只係估估吓，投機之作，要抱賭大細嘅心態，量力而為。